X
ട്രംപിന്റെ മരുമകന്‍ കുഷ്‌നെര്‍ ഖത്തറും സൗദിയും സന്ദര്‍ശിക്കുന്നു; പ്രധാന ലക്ഷ്യങ്ങളെക്കുറിച്ച് ഊഹോപോഹം

ട്രംപിന്റെ മരുമകന്‍ കുഷ്‌നെര്‍ ഖത്തറും സൗദിയും സന്ദര്‍ശിക്കുന്നു; പ്രധാന ലക്ഷ്യങ്ങളെക്കുറിച്ച് ഊഹോപോഹം

personmtp rafeek access_timeTuesday December 1, 2020
HIGHLIGHTS
അമേരിക്കയില്‍ ട്രംപ് ഭരണകൂടം അധികാരമൊഴിയാന്‍ ആഴ്ചകള്‍ മാത്രം ബാക്കി നില്‍ക്കെ മരുമകനും സീനിയര്‍ ഉപദേഷ്ടാവുമായ ജറാഡ് കുഷ്‌നെര്‍ സൗദി അറേബ്യയും ഖത്തറും സന്ദര്‍ശിക്കാനൊരുങ്ങ

വാഷിങ്ടണ്‍: അമേരിക്കയില്‍ ട്രംപ് ഭരണകൂടം അധികാരമൊഴിയാന്‍ ആഴ്ചകള്‍ മാത്രം ബാക്കി നില്‍ക്കെ മരുമകനും സീനിയര്‍ ഉപദേഷ്ടാവുമായ ജറാഡ് കുഷ്‌നെര്‍ സൗദി അറേബ്യയും ഖത്തറും സന്ദര്‍ശിക്കാനൊരുങ്ങുന്നു. ദിവസങ്ങള്‍ക്കുള്ളില്‍ സന്ദര്‍ശനമുണ്ടാവുമെന്നാണു റിപോര്‍ട്ട്. മിഡിലീസ്റ്റ് പ്രതിനിധി അവി ബെര്‍ക്കോവിറ്റ്സ്, ഇന്റര്‍നാഷനല്‍ ഡവലപ്മെന്റ് ഫിനാന്‍സ് കോര്‍പറേഷന്‍ സിഇഒ ആദം ബോഹ്ലെര്‍, മുന്‍ ഇറാന്‍ അംബാസഡര്‍ ബ്രയാന്‍ ഹുക്ക് എന്നിവരും കുഷ്‌നെര്‍ക്കൊപ്പമുണ്ടാവും.

ഖത്തറും മറ്റ് ചില ഗള്‍ഫ് രാജ്യങ്ങളുമായി നിലനില്‍ക്കുന്ന തര്‍ക്കങ്ങള്‍ പരിഹരിക്കുകയെന്നതാണ് കുഷ്നെറുടെ സന്ദര്‍ശനത്തിനു പിന്നിലെ പ്രധാന ലക്ഷ്യമെന്നാണ് വിലയിരുത്തപ്പെടുന്നത്. അതുവഴി മൂന്നര വര്‍ഷത്തിലേറെയായി ഖത്തറിനെതിരേ നിലനില്‍ക്കുന്ന ഉപരോധം പിന്‍വലിക്കാനാകുമെന്നും അദ്ദേഹത്തിന് പ്രതീക്ഷയുണ്ട്. സൗദി അറേബ്യയുടെ നേതൃത്വത്തിലാണ് 2017ല്‍ യുഎഇ, ബഹ്റൈന്‍, ഈജിപ്ത് എന്നീ രാജ്യങ്ങള്‍ ചേര്‍ന്ന് ഖത്തറിനെതിരേ ഉപരോധം പ്രഖ്യാപിച്ചത്

സൗദി കിരീടാവകാശി മുഹമ്മദ് ബിന്‍ സല്‍മാന്‍, ഖത്തര്‍ അമീര്‍ ശെയ്ഖ് തമീം ബിന്‍ ഹമദ് ആല്‍ഥാനി എന്നിവരുമായി കുഷ്നെര്‍ ചര്‍ച്ചകള്‍ നടത്തും. ഇരു നേതാക്കളുമായുള്ള കുഷ്നെറുടെ ഊഷ്മള ബന്ധം ഉപയോഗപ്പെടുത്തി ഇരു രാജ്യങ്ങളും തമ്മിലുള്ള തര്‍ക്കങ്ങള്‍ തീര്‍ക്കാനാവുമെന്നാണ് യുഎസ് സംഘത്തിന്റെ പ്രതീക്ഷ. വാള്‍സ്ട്രീറ്റ് ജേണലാണ് ഔദ്യോഗിക വൃത്തങ്ങളെ ഉദ്ധരിച്ച് വാര്‍ത്ത പുറത്തുവിട്ടത്

സൗദിയും ഖത്തറും തമ്മിലുള്ള പ്രശ്നങ്ങള്‍ പരിഹരിക്കുന്നതിലൂടെ അറബ് മേഖലയില്‍ നിലവിലുള്ള അസ്ഥിരതയ്ക്ക് അറുതി വരുത്തുകയെന്നത് ജനുവരിയില്‍ അധികാരമൊഴിയുന്ന ട്രംപ് ഭരണകൂടത്തിന്റെ ലക്ഷ്യങ്ങളിലൊന്നായാണ് വിലയിരുത്തപ്പെടുന്നത്. നേരത്തേ ഖത്തറിനെതിരായ ഉപരോധം പിന്‍വലിപ്പിക്കാന്‍ ട്രംപും കുഷ്നെറും നടത്തിയ ശ്രമങ്ങളൊന്നും വിജയിച്ചിരുന്നില്ല. ഇക്കാര്യത്തിലുള്ള അവസാന ശ്രമമെന്ന രീതിയിലാണ് കുഷ്നെറുടെ മിഡിലീസ്റ്റ് സന്ദര്‍ശനം. ഖത്തര്‍ ഉപരോധം അവസാനിപ്പിക്കുന്നതിനുള്ള ശ്രമങ്ങള്‍ക്ക് നേതൃത്വം നല്‍കുന്ന കുവൈത്തിന്റെ വിദേശകാര്യമന്ത്രി ശെയ്ഖ് അഹ്മദ് നാസര്‍ അല്‍ മുഹമ്മദ് അല്‍ സബാഹുമായി കഴിഞ്ഞയാഴ്ച വൈറ്റ് ഹൗസില്‍ വെച്ച് കുഷ്നെര്‍ ചര്‍ച്ചകള്‍ നടത്തിയിരുന്നു.

സൗദി-ഖത്തര്‍ തര്‍ക്കങ്ങള്‍ പരിഹരിക്കുന്നതിനൊപ്പം ഇസ്രായേലുമായുള്ള സൗദിയുടെ ബന്ധം അരക്കിട്ടുറപ്പിക്കുകയെന്നതും കുഷ്നെറുടെ സന്ദര്‍ശന ലക്ഷ്യങ്ങളിലൊന്നാണെന്നും നിരീക്ഷകര്‍ കരുതുന്നു. ഇസ്രായേലില്‍ നിന്ന് കിഴക്കന്‍ രാജ്യങ്ങളിലേക്കുള്ള വിമാനങ്ങള്‍ക്ക് സൗദിയുടെ വ്യോമാതിര്‍ത്തികള്‍ തുറന്നുകൊടുക്കുന്ന കാര്യത്തില്‍ അന്തിമ തീരുമാനം എടുപ്പിക്കുകയാണ് ഇവയിലൊന്ന്.

സൗദി കിരീടാവകാശിയും ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവും തമ്മില്‍ റിയാദില്‍ വച്ച് നടന്ന രഹസ്യ കൂടിക്കാഴ്ചയുടെ തുടര്‍ച്ചയായാണ് കുഷ്നെര്‍ സൗദിയിലെത്തുന്നതെന്ന കാര്യവും ശ്രദ്ധേയമാണ്.


 

SHARE :
folder_openTags
content_copyCategory