ദോഹ; കോവിഡ് നിയമലംഘനം നടത്തിയ 330 പേർ ഖത്തറിൽ അറസ്റ്റിലായി. ആഭ്യന്തര മന്ത്രാലയമാണ് ഇക്കാര്യമറിയിച്ചത്.
മാസ്ക് ധരിക്കാത്തതിന് 300 പേർക്കെതിരെയും സാമൂഹിക അകലം പാലിക്കാത്തതിന് 24 പേർക്കെതിരെയും നടപടി എടുത്തിട്ടുണ്ട്. കൂടാതെ എഹ്‌തെറാസ് ഡൗൺലോഡ് ചെയ്യാത്തതിന് ആറ് പേരെയും പിടികൂടിയിട്ടുണ്ട്. പകർച്ചവ്യാധികൾ സംബന്ധിച്ച 1990-ലെ 17-ാം നമ്പർ നിയമം, കോവിഡ്-19 ന്റെ വ്യാപനം തടയുന്നതിന് രാജ്യത്ത് പ്രാബല്യത്തിൽ വന്ന മുൻകരുതൽ നടപടികൾ എന്നിവയ്ക്ക് അനുസൃതമായാണ് നടപടികൾ.
തങ്ങളുടെ സുരക്ഷയും മറ്റുള്ളവരുടെ സുരക്ഷയും ഉറപ്പാക്കുന്നതിന് മുൻകരുതൽ നടപടികൾ പാലിക്കാൻ നിയുക്ത അധികാരികൾ പൊതുജനങ്ങളോട് അഭ്യർത്ഥിച്ചു. സാംക്രമിക രോഗങ്ങളും പ്രതിരോധ നടപടികളും സംബന്ധിച്ച് 1990 ലെ 17-ാം നമ്പർ നിയമത്തിൽ നിന്ന് എടുത്ത കാബിനറ്റ് തീരുമാനമനുസരിച്ച്, വീടിന് പുറത്ത് മാസ്ക് ധരിക്കാത്ത ആളുകൾക്ക് മൂന്ന് വർഷം വരെ തടവും കൂടാതെ/അല്ലെങ്കിൽ 200,000 റിയാൽ പിഴയും ലഭിക്കും.
