ദോഹ∙സ്റ്റേഡിയം ഓഫ് ദി ഇയർ പുരസ്‌കാരത്തിനുള്ള നോമിനേഷൻ പട്ടികയിൽ ഖത്തറിന്റെ ലോകകപ്പ് ഫൈനൽ വേദിയായ ലുസെയ്ൽ സ്റ്റേഡിയവും. ഡിബി വെബ്‌സൈറ്റിൻ്റെ സ്റ്റേഡിയം ഓഫ് ദ് ഇയർ പുരസ്‌കാരത്തിലേയ്ക്കാണ് ലുസെയ്ലിനെ നാമനിദ്ദേശം ചെയ്തത്. ഡിസൈനിങ്ങിലും നിർമിതിയിലും ഘടനയിലുമെല്ലാം സവിശേഷതകൾ ഉള്ള സ്റ്റേഡിയമാണ് ലുസൈൽ.
ആഗോള തലത്തിലുള്ള 23 സ്റ്റേഡിയങ്ങളാണ് പട്ടികയിൽ ഇടം നേടിയിരിക്കുന്നത്. ഓൺലൈൻ റേറ്റിങ് കണക്കാക്കിയാണ് പുരസ്‌കാരത്തിന് അർഹമായ സ്റ്റേഡിയം തിരഞ്ഞെടുക്കുന്നത്. ഖത്തറിലെ ലുസെയ്ൽ സ്റ്റേഡിയം, ഇറാഖിലെ അൽമിന, അൽ സവ്ര സ്റ്റേഡിയങ്ങൾ എന്നിവയാണ് അറബ്-ഗൾഫ് മേഖലയിൽ നിന്നും ചുരുക്കപ്പട്ടികയിൽ ഉൾപ്പെട്ടിട്ടുള്ളത്. പട്ടികയിലെ 23 എണ്ണത്തിൽ പന്ത്രണ്ടും ചൈനയുടേതാണ്. മാർച്ച് 14 വരെയാണ് വോട്ടെടുപ്പ്. വെബ്‌സൈറ്റിൽ പ്രവേശിച്ച് വോട്ടു രേഖപ്പെടുത്താം.
