Thursday, May 13, 2021
Home Gulf Qatar ഖ​ത്ത​രി ഉ​ല്‍​പ​ന്ന​ങ്ങ​ള്‍​ക്ക് ഇ​നി പ്ര​ത്യേ​ക ലോ​ഗോ

ഖ​ത്ത​രി ഉ​ല്‍​പ​ന്ന​ങ്ങ​ള്‍​ക്ക് ഇ​നി പ്ര​ത്യേ​ക ലോ​ഗോ

ദോഹ: ഖത്തരി ഉല്‍പന്നങ്ങള്‍ക്കായി കഴിഞ്ഞദിവസമാണ് പ്രത്യേക ലോഗോ വാണിജ്യ വ്യവസായ മന്ത്രാലയം പുറത്തിറക്കിയത്. ഖത്തരി പതാകയോടൊപ്പം അറബിയിലും ഇംഗ്ലീഷിലുമായി ഖത്തരി ഉല്‍പന്നം എന്ന് ആലേഖനം ചെയ്തതാണ് പുതിയ ലോഗോ. മന്ത്രാലയത്തിന്റെ സമൂഹ മാധ്യമങ്ങള്‍ വഴി പുറത്തുവിട്ട വിഡിയോ സന്ദേശത്തിലാണ് പുതിയ ലോഗോ പ്രകാശനം ചെയ്തത്. ഉല്‍പാദകര്‍ക്കും നിര്‍മാതാക്കള്‍ക്കും ഔട്ട്‌ലെറ്റുകാര്‍ക്കും തങ്ങളുടെ ഉല്‍പന്നങ്ങളില്‍ പുതിയ ലോഗോ പതിക്കാന്‍ ആറ് മാസത്തെ സമയമാണ് മന്ത്രാലയം അനുവദിച്ചിരിക്കുന്നത്. എല്ലാവരും സമയക്രമം പാലിക്കണമെന്നും മന്ത്രാലയം നിര്‍ദേശിച്ചിട്ടുണ്ട്. ബന്ധപ്പെട്ട വകുപ്പുകളില്‍നിന്നും മതിയായ ലൈസന്‍സും അംഗീകാരവും നേടിയ നിര്‍മാതാക്കള്‍ക്കും ഉല്‍പാദകര്‍ക്കും ഔട്ട്‌ലെറ്റുകള്‍ക്കും പുതിയ ലോഗോ പതിക്കാം. ഉല്‍പന്നത്തിന്റെ കവറിലെ മുന്‍ഭാഗത്തോ മറ്റു ഭാഗത്തോ ഉപഭോക്താക്കള്‍ക്ക് വ്യക്തമായി കാണാന്‍ സാധിക്കും വിധത്തില്‍ ലോഗോ പതിച്ചിരിക്കണം. എന്നാല്‍ ഒരിക്കലും ഉല്‍പന്നത്തിന്റെ അകത്ത് ലോഗോ പതിപ്പിക്കാന്‍ പാടില്ല.

പൂര്‍ണമായും പ്രാദേശികമായി ഉല്‍പാദിപ്പിക്കപ്പെട്ടതോ പകുതി പ്രാദേശികമായി ഉല്‍പാദിപ്പിക്കപ്പെട്ടതോ ആയ എല്ലാ ഉല്‍പന്നങ്ങളിലും ലോഗോ പതിക്കാവുന്നതാണ്. ലോഗോ രൂപരേഖയുടെ എല്ലാ മാര്‍ഗനിര്‍ദേശങ്ങളും പാലിച്ചുകൊണ്ടായിരിക്കണം പതിക്കേണ്ടത്.

ലോഗോയുടെ ഉള്ളടക്കത്തിലോ രൂപത്തിലോ മാറ്റം വരുത്താന്‍ ഒരിക്കലും അനുവാദമുണ്ടായിരിക്കുകയില്ല. ഉല്‍പന്നങ്ങള്‍ വിതരണം ചെയ്യുന്ന വാഹനങ്ങളുടെ പുറത്തും ലോഗോ പതിക്കാവുന്നതാണ്. എന്നാല്‍ വാഹനത്തിന്റെ വലുപ്പത്തിനനുസരിച്ച് അനുവദിച്ചിട്ടുള്ള അനുപാതത്തിലായിരിക്കണം ലോഗോ ഡിസൈന്‍ ചെയ്യേണ്ടത്. മാര്‍ക്കറ്റിങ് ആവശ്യങ്ങള്‍ക്കും പരസ്യ, പ്രസിദ്ധീകരണങ്ങള്‍ക്കുമുള്ള ഉല്‍പന്നങ്ങളിലും ലോഗോ ഉള്‍പ്പെടുത്താം.

Most Popular