Saturday, May 15, 2021
Home Ediotrs Pick പ്രശാന്തിന്റെ മൃതദേഹത്തിനരികെ കണ്ണുതുടച്ച് പാകിസ്താന്‍കാരനായ അസര്‍ ഭായി; മതവും ദേശവും കടന്ന സ്‌നേഹബന്ധം

പ്രശാന്തിന്റെ മൃതദേഹത്തിനരികെ കണ്ണുതുടച്ച് പാകിസ്താന്‍കാരനായ അസര്‍ ഭായി; മതവും ദേശവും കടന്ന സ്‌നേഹബന്ധം

ദുബൈ: പ്രശാന്തിന്റെ മൃതദേഹം നാട്ടിലേക്ക് അയക്കാനായി പെട്ടിയിലേക്ക് എടുത്ത് വയ്ക്കുമ്പോള്‍ അസര്‍ ഭായി അരികത്തു നിന്നു കണ്ണു തുടക്കുന്നുണ്ടായിരുന്നു. ചങ്കുപറിച്ചെടുക്കുന്ന വേദന ആ മുഖത്ത് വായിച്ചെടുക്കാമായിരുന്നു. പാകിസ്താനിയായ അസര്‍ മഹ്‌മൂദിന് കോഴിക്കോട് ഒളവണ്ണ സ്വദേശി പ്രശാന്ത് ഒരു തൊഴിലാളി മാത്രമായിരുന്നില്ല.

കഴിഞ്ഞ ദിവസം ഹൃദയാഘാതം മൂലം മരിച്ച പ്രശാന്തിന്റെ മൃതദേഹം നാട്ടിലേക്ക് അയക്കുന്നതിന് മുമ്പ് എംബാമിങ് സെന്‍ന്ററില്‍ അസര്‍ പൊട്ടിക്കരഞ്ഞത് അവിടെ കൂടി നിന്നവരുടെയും കണ്ണുകളെ ഈറനണിയിച്ചിരുന്നു. മനുഷ്യര്‍ തമ്മിലുള്ള സ്‌നേഹബന്ധം ദേശത്തിനും മതത്തിനും അപ്പുറത്താണെന്ന് മനസ്സിലാക്കി തരുന്ന ആ നിമിഷങ്ങള്‍ യുഎഇയിലെ പ്രമുഖ ജീവകാരുണ്യ പ്രവര്‍ത്തകനായ അഷ്‌റഫ് താമരശ്ശേരിയാണ് ഫേസ്ബുക്കില്‍ പങ്കുവെച്ചത്.

അസറിന്റെ വിശ്വസ്തനായ തൊഴിലാളിയായിരുന്നു പ്രശാന്ത്. കഴിഞ്ഞയാഴ്ച നാട്ടില്‍ പോയി വരാന്‍ അസര്‍ പറഞ്ഞിട്ടും ഭായിയെ വിട്ട് പോകുന്നില്ലെന്നായിരുന്നു പ്രശാന്തിന്റെ മറുപടി. പക്ഷേ, മൂന്ന് ദിവസം മുമ്പ് ഹൃദയാഘാതം മൂലം പ്രശാന്ത് മരിക്കുകയായിരുന്നു.

അഷ്‌റഫ് താമരശ്ശേരിയുടെ ഫേസ്ബുക്ക് പോസ്റ്റിന്റെ പൂര്‍ണരൂപം

കോഴിക്കോട് ഒളവണ്ണ സ്വദേശി പ്രശാന്ത്, പാകിസ്താനിയായ അസര്‍ ഭായിക്ക് ഒരു തൊഴിലാളി മാത്രമായിരുന്നില്ല, സ്വന്തം സഹോദരനായിരുന്നു. അത് ഞാന്‍ മനസ്സിലാക്കിയത്, ഇന്നലെ എംബാമിങ് സെന്ററില്‍ പ്രശാന്തിന്റെ മൃതദേഹം നാട്ടിലേക്ക് അയക്കുവാന്‍ വേണ്ടി പെട്ടിയിലെടുത്ത് വെക്കുമ്പോള്‍. അസര്‍ ഭായിയുടെ കണ്ണ് നിറയുന്നത് ഞാന്‍ കണ്ടു. ദേശത്തിനും മതത്തിനും മുകളിലായിരുന്നു അവര്‍ തമ്മിലുളള സ്‌നേഹ ബന്ധം.

വര്‍ഷങ്ങള്‍ക്ക് മുമ്പ് ഒരു സാധാരണ തൊഴിലാളിയായിട്ടാണ് പ്രശാന്ത്, പാകിസ്താന്‍ സ്വദേശിയായ അസര്‍ മഹ്‌മൂദിന്റെ കമ്പനിയില്‍ ജോലിക്ക് പ്രവേശിച്ചത്. അവിടെ നിന്നും അവസാന നിമിഷം വരെയും ഭായിയുടെ വിശ്വസ്തനായിരുന്നു. കഴിഞ്ഞയാഴ്ച നാട്ടിലേക്ക് പോയിട്ട് വരാന്‍ ഭായി നിര്‍ബന്ധിച്ചെങ്കിലും ഭായിയെ വിട്ട് പോകുവാന്‍ പ്രശാന്ത് തയ്യാറായിരുന്നില്ല. രണ്ട് ദിവസം മുമ്പ് പെട്ടെന്നുണ്ടായ ഹൃദയാഘാതം മൂലം പ്രശാന്ത് മരണപ്പെടുകയായിരുന്നു.

എംബാമിങ് സെന്ററില്‍ ഇരുന്ന് വിങ്ങിപ്പൊട്ടി കരയുന്ന ഭായിയെ കണ്ടപ്പോള്‍ ഇന്ന് ലോകത്ത് നമ്മള്‍ കാണുന്ന കാഴ്ചയുടെ രീതിയെ പറ്റി ചിന്തിച്ചുപോയി. ഭാഷക്കും ദേശത്തിനും മതത്തിനും വര്‍ഗത്തിനും നിറത്തിനുമപ്പുറം മറ്റൊരു ലോകമുണ്ട്. അവിടെയും മനുഷ്യരാണ് ജീവിക്കുന്നത്.
ALSO WATCH

 

Most Popular