ഡോണള്‍ഡ് ട്രംപിന്റെ അക്കൗണ്ട് സ്ഥിരമായി പൂട്ടി ട്വിറ്റര്‍
വാഷിങ്ടണ്‍: അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ അക്കൗണ്ട് പൂര്‍ണമായും അടച്ച് ട്വിറ്റര്‍. ട്രംപിന്റെ സമീപകാല ട്വീറ്റുകള്‍ ആക്രമണം പ്രോത്സാഹിപ്പിക്കുന്നതാണെന്ന വിശദീകരണവുമായാണ് ട്വിറ്ററിന്റെ നടപടി.
യുഎസ് പാര്‍ലമെന്റ് മന്ദിരമായ ക്യാപിറ്റോളിലേക്ക് നടന്ന അതിക്രമത്തിന്റെ അടിസ്ഥാനത്തില്‍ നേരത്തെ 24 മണിക്കൂര്‍ ട്രംപിന്റെ അക്കൗണ്ട് മരവിപ്പിച്ചിരുന്നു. പിന്നീട് അത് ഒരാഴ്ചത്തേക്ക് നീട്ടുകയും ചെയ്തു. ഭാവിയിലും ട്രംപിന്റെ പ്രകോപനമുണ്ടാകുവാന്‍ സാധ്യതയുണ്ടെന്ന് കാണിച്ചാണ് ഇത്തരത്തില്‍ ഒരു നീക്കമുണ്ടായത്.
ഇതിനൊപ്പം തന്നെ ട്രംപിനെ ഇംപീച്ച് ചെയ്യാനുള്ള നടപടികള്‍ക്കും അമേരിക്കയില്‍ തുടക്കം കുറിച്ചു. ഡൈമോക്രാറ്റുകളാണ് ട്രംപിനെ ഇംപീച്ച് ചെയ്യുന്നതിനുള്ള നീക്കങ്ങള്‍ ആരംഭിച്ചത്.
ട്രംപ് ഉടന്‍ രാജിവെക്കാന്‍ തയ്യാറായില്ലെങ്കില്‍ ഇംപീച്ചുമെന്റുമായി മുന്നോട്ട് പോകുമെന്ന് സ്പീക്കര്‍ നാന്‍സി പൊലോസി പറഞ്ഞു.
തെരഞ്ഞെടുപ്പ് ഫലം വിപരീതമായ സമയം മുതലേ ട്രംപ് നിരവധി ഉദ്യോഗസ്ഥരെ അപ്രതീക്ഷിതമായി പുറത്താക്കിയ നടപടികളും ഭരണരംഗത്തെ ഞെട്ടിച്ചിരുന്നു. പ്രമുഖരായ പല ഉദ്യോഗസ്ഥരും സ്ഥാനം ഒഴിയുകയും ചെയ്തു.
ട്രംപ് സ്ഥാനം ഒഴിയേണ്ടത് ഈ മാസമാണ്. ജനുവരി 20 ന് നിയുക്ത പ്രസിഡന്റ് ജോ ബൗഡനും വൈസ് പ്രസിഡന്റ് കമലാ ഹാരിസും സ്ഥാനമേല്‍ക്കും. പുതിയ ഭരണനേതൃത്വം സത്യപ്രതിജ്ഞ ചെയ്യുന്ന ചടങ്ങില്‍ പങ്കെടുക്കില്ലെന്ന ട്വീറ്റാണ് ട്രംപ് ഏറ്റവും ഒടുവില്‍ ചെയ്തത്. ഇതിനിടെ അക്രമത്തിന്റെ ഉത്തരവാദിത്തം ട്രംപിനായതിനാല്‍ പുറത്താക്കണമെന്നും ഇംപീച്ച് ചെയ്യണമെന്നും ഭരണ രംഗത്തും സെനറ്റിലും ആവശ്യം ഉയരുന്നുണ്ട്. അതേസമയം, ബൈഡന്റെ സത്യപ്രതിജ്ഞാ ചടങ്ങില്‍ ട്രംപ് പങ്കെടുക്കില്ലെന്നും റിപ്പോര്‍ട്ടുകള്‍ വരുന്നുണ്ട്.