Saturday, May 15, 2021
Home News International കർഷക സമരത്തിനുള്ള പിന്തുണ ആവർത്തിച്ച് കാനഡ

കർഷക സമരത്തിനുള്ള പിന്തുണ ആവർത്തിച്ച് കാനഡ

വിവാദ കര്‍ഷക നിയമത്തിനെതിരെ രാജ്യത്ത് തുടരുന്ന കര്‍ഷക സമരത്തിനുള്ള പിന്തുണ ആവര്‍ത്തിച്ച് കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോ. ആഭ്യന്തര പ്രശ്‌നത്തില്‍ ഇടപെട്ടുവെന്ന ഇന്ത്യയുടെ പ്രതിഷേധം നിലനില്‍ക്കെയാണ് നിലപാടില്‍ മാറ്റമില്ലെന്ന് കാനഡ ആവര്‍ത്തിച്ചത്. കര്‍ഷക സമരത്തെ പിന്തുണച്ച സംഭവത്തില്‍ നേരത്തെ, കനേഡിയന്‍ ഹൈക്കമ്മീഷണറെ വിളിച്ചുവരുത്തി അതൃപ്തി അറിയിച്ചിരുന്നു ഇന്ത്യ. ട്രൂഡോയുടെ പരാമര്‍ശം ഇരു രാജ്യങ്ങളും തമ്മിലുള്ള നയതന്ത്ര ബന്ധത്തെ ഗുരുതരമായി ബാധിക്കുമെന്നും ഇന്ത്യ ഹൈക്കമ്മീഷണര്‍ക്ക് മുന്നറിയിപ്പു നല്‍കുകയുണ്ടായി. എന്നാല്‍ ലോകത്തെവിടെയും നടക്കുന്ന സമാധാനപൂര്‍വമായ സമരത്തിനുള്ള അവകാശത്തെ കാനഡ മാനിക്കുന്നുവെന്നാണ് ഇതിനോട് ട്രൂഡോ പ്രതികരിച്ചത്. നിലവില്‍ കര്‍ഷകരുമായി ചര്‍ച്ച ആരംഭിച്ചതില്‍ സന്തോഷമുണ്ടെന്നും അദ്ദേഹം മാധ്യമങ്ങളോട് പറഞ്ഞു.

കര്‍ഷക സമരത്തിന് പിന്തുണ നല്‍കുന്നത് ഇരു രാജ്യങ്ങള്‍ക്കുമിടയിലെ ബന്ധത്തെ ബാധിക്കുമെന്ന ആശങ്കയില്ലേ എന്ന മാധ്യമങ്ങളുടെ ചോദ്യത്തിന്, മനുഷ്യാവകാശങ്ങള്‍ക്കും, സമാധാനപരമായി പ്രതിഷേധം നടത്താനുള്ള അവകാശത്തിനും വേണ്ടി കാനഡ നിലകൊള്ളുമെന്നായിരുന്നു ജസ്റ്റിന്‍ ട്രൂഡോ പറഞ്ഞത്.

കര്‍ഷകരുടെ പ്രതിഷേധത്തെകുറിച്ച് ഇന്ത്യയില്‍ നിന്നുവരുന്ന വാര്‍ത്തകള്‍ ആശങ്കാജനകമാണെന്നായിരുന്നു നേരത്തെ കാനഡ പറഞ്ഞത്. സുഹൃത്തുക്കളെയും കുടുംബങ്ങളെയും കുറിച്ച് ആധിയുണ്ട്. തങ്ങളുടെ അവകാശങ്ങള്‍ക്ക് വേണ്ടി സമാധാനപരമായി പോരാടുന്ന കര്‍ഷകര്‍ക്കൊപ്പമാണ് കാനഡയെന്നും പറഞ്ഞിരുന്നു.

Most Popular