Monday, July 26, 2021
Home News Kerala എൻസിപി നേതാവിനെതിരായ പീഡന പരാതി ഒതുക്കി തീർക്കാൻ ഇടപെട്ടു; മന്ത്രി എ കെ ശശീന്ദ്രന്‍റെ ഓഡിയോ...

എൻസിപി നേതാവിനെതിരായ പീഡന പരാതി ഒതുക്കി തീർക്കാൻ ഇടപെട്ടു; മന്ത്രി എ കെ ശശീന്ദ്രന്‍റെ ഓഡിയോ ക്ലിപ്പ് പുറത്ത്

തിരുവനന്തപുരം: എന്‍ സി പി സംസ്ഥാന എക്‌സിക്യൂട്ടീവ് അംഗം പത്മാകരനെതിരായ സ്ത്രീപീഡന പരാതി ഒതുക്കി തീര്‍ക്കാന്‍ മന്ത്രി എ കെ ശശീന്ദ്രൻ ഇടപെട്ടതായി സൂചന. പെണ്‍കുട്ടിയുടെ അച്ഛനെ വിളിച്ചാണ് പരാതി ഒതുക്കി തീര്‍ക്കാന്‍ ശശീന്ദ്രന്‍ ആവശ്യപ്പെട്ടത്. കഴിഞ്ഞ മാര്‍ച്ചിലാണ് സംഭവം നടക്കുന്നത്.

എന്‍ സി പി നേതാവ് യുവതിയുടെ കൈയില്‍ കയറി പിടിക്കുകയും, ഭീഷണിപ്പെടുത്തുകയും ചെയ്‌തിരുന്നു. പെണ്‍കുട്ടിയുടെ പിതാവും എന്‍ സി പിക്കാരനാണ്. യുവതി തദ്ദേശ തിരഞ്ഞെടുപ്പില്‍ മത്സരിക്കുകയും ചെയ്‌തിരുന്നു. നല്ല രീതിയില്‍ കേസ്‌ അവസാനിപ്പിക്കണമെന്നാണ് ശശീന്ദ്രന്‍ പെണ്‍കുട്ടിയുടെ പിതാവിനോട് പറയുന്നത്. ശശീന്ദ്രനും പെണ്‍കുട്ടിയുടെ പിതാവും തമ്മില്‍ സംസാരിക്കുന്ന ഓഡിയോ ക്ലിപ്പ് പുറത്തായിട്ടുണ്ട്.
സംഭവസമയത്ത് പൊലീസില്‍ പരാതി ഉന്നയിക്കാന്‍ ധൈര്യമുണ്ടായില്ലെന്നും തുടര്‍ച്ചയായി പത്മാകരന്‍ സാമൂഹിക മാദ്ധ്യമങ്ങളിലൂടെ അപകീര്‍ത്തിപ്പെടുത്താനുള്ള ശ്രമം നടത്തുന്ന പശ്ചാത്തലത്തിലാണ് പരാതിപ്പെട്ടതെന്നും യുവതി വ്യക്തമാക്കി. എന്നാല്‍ തന്‍റെ വാക്കുകളെ തെറ്റായി വ്യാഖ്യാനിക്കരുതെന്ന് മന്ത്രി എ കെ ശശീന്ദ്രന്‍ മാദ്ധ്യമങ്ങളോട് പറഞ്ഞു.

അതേസമയം മകളുടെ പീഡന പരാതി പിന്‍വലിക്കാന്‍ മന്ത്രി എ.കെ ശശീന്ദ്രന്‍ ഇടപെട്ടതില്‍ കൂടുതല്‍ വെളിപ്പെടുത്തലുമായി അച്ഛന്‍. കേസില്‍ രാഷ്ട്രീയ ഇടപെടല്‍ ഉണ്ടായതായി അച്ഛന്‍. പാര്‍ട്ടിയില്‍ ആദ്യം പരാതിപ്പെട്ടെങ്കിലും, നടപടിയൊന്നും ഇല്ലാത്തതിനാലാണ് പൊലീസില്‍ പരാതിയുമായി ചെന്നത്. എന്നാല്‍ അവിടെയും ഫലമൊന്നും ഉണ്ടായില്ലെന്നു മാത്രമല്ല, പരാതി പിന്‍വലിക്കാന്‍ മന്ത്രി ഇടപെടുകയായിരുന്നെന്നും അച്ഛന്‍ പറയുന്നു.

Most Popular