പ്രവാസികള്‍ രണ്ടാം ഡോസ് വാക്‌സിന്‍ വേഗത്തില്‍ ലഭിക്കാനും പാസ്‌പോര്‍ട്ട് നമ്പര്‍ സര്‍ട്ടിഫിക്കറ്റില്‍ ചേര്‍ക്കാനും ചെയ്യേണ്ടത്

തിരുവനന്തപുരം: കേരളത്തില്‍ നിന്ന് വിദേശത്ത് പോകേണ്ടവര്‍ക്ക് രണ്ടാം ഡോസ് വാക്സിന്‍ നേരത്തെ ലഭിക്കുന്നതിനും വാക്‌സിന്‍ സര്‍ട്ടിഫിക്കറ്റില്‍ പാസ്‌പോര്‍ട്ട് നമ്പര്‍ ചേര്‍ക്കുന്നതിനും ചെയ്യേണ്ട കാര്യങ്ങള്‍ സംബന്ധിച്ച് വിശവിവരം സര്‍ക്കാര്‍ പുറത്തിറക്കി. ഒന്നാം ഡോസ് എടുത്ത ശേഷം നാലു മുതല്‍ ആറ് ആഴ്ചകള്‍ക്ക് ശേഷം രണ്ടാം ഡോസ് വാക്സിന്‍ ലഭിക്കുന്നതിന് ചെയ്യേണ്ട കാര്യങ്ങളാണ് സര്‍ക്കാര്‍ വ്യക്തമാക്കിയിട്ടുള്ളത്.

പ്രവാസികള്‍ക്കും വിദേശത്തേക്ക് ജോലിക്കോ പഠനത്തിനോ പോകുന്നവര്‍ക്കും കോവിഡ് വാക്‌സിനേഷന്‍ ചെയ്യുന്നതിന് വേണ്ട പ്രത്യേക ക്രമീകരണം ഏര്‍പ്പെടുത്തിയിട്ടുണ്ട്.

രണ്ട് ഡോസ് വാക്‌സിനും സ്വീകരിച്ചവര്‍ക്ക് ആധാര്‍ നമ്പറിന് പകരം പാസ്സ് പോര്‍ട്ട് നമ്പര്‍ രേഖപ്പെടുത്തിയ വാക്‌സിനേഷന്‍ സര്‍ട്ടിഫിക്കറ്റ് ലഭിക്കുന്നതിന്നായി https://covid19.kerala.gov.in/vaccine/എന്ന വെബ് പോര്‍ട്ടലില്‍ ആണ് രജിസ്‌ട്രേഷന്‍ ചെയ്യേണ്ടത്. ഇതിന്നായി www.cowin.gov.in എന്ന വെബ് പോര്‍ട്ടലില്‍ മുമ്പ് വാക്‌സിന്‍ എടുത്തതിന്റെ
1. ഫൈനല്‍/പ്രൊവിഷണല്‍ സര്‍ട്ടിഫിക്കറ്റ്
2.ഒന്നാം ഡോസ് വാക്‌സിന് ഉപയോഗിച്ച ഐഡി കാര്‍ഡ്
3. പാസ്‌പോര്‍ട്ട്,
4.കാലവധിയുള്ള വിസ/ വര്‍ക്ക് പെര്‍മിറ്റ്/ അഡ്മിഷന്‍ ലെറ്റര്‍ എന്നിവയും ആധാര്‍ നമ്പര്‍ വിവരങ്ങളും നല്‍കി അപേക്ഷ സമര്‍പ്പിക്കാവുന്നതാണ്.

ഇങ്ങനെ സമര്‍പ്പിച്ച അപേക്ഷകള്‍ ജില്ലാ മെഡിക്കല്‍ ഓഫീസര്‍ അംഗീകരിച്ചതിന്ന് ശേഷം പാസ്സ് പോര്‍ട്ട് നമ്പര്‍, വാക്‌സിന്റെ പേര് എന്നിവ അടങ്ങിയ പുതിയ സര്‍ട്ടിഫിക്കറ്റ് www.covid19.kerala.gov.in/vaccine/ എന്ന പോര്‍ട്ടലില്‍ നിന്ന് തന്നെ ലഭിക്കുന്നതാണ്.

ആദ്യ ഡോസ് എടുത്ത ശേഷം 4 മുതല്‍ 6 ആഴ്ച്ചകള്‍ക്ക് ഉള്ളില്‍ വിദേശത്ത് പോകുന്നവര്‍ക്ക് രണ്ടാം ഡോസ് വാക്‌സിന്‍ ലഭിക്കുന്നതിന്നായി www.covid19.kerala.gov.in/vaccine/ എന്ന വെബ് പോര്‍ട്ടലില്‍ ഒന്നാം ഡോസ് വാക്‌സിനേഷന്‍ ചെയ്തതിന്റെ
1. ഫൈനല്‍/പ്രൊവിഷണല്‍ സര്‍ട്ടിഫിക്കറ്റ്
2. ഒന്നാം ഡോസ് വാക്‌സിന് ഉപയോഗിച്ച ഐഡി കാര്‍ഡ്,
3. പാസ്സ്‌പോര്‍ട്ട്
4. കാലവധിയുള്ള വിസ/ വര്‍ക്ക് പെര്‍മിറ്റ്/ അഡ്മിഷന്‍ ലെറ്റര്‍ എന്നിവയും ആധാര്‍ നമ്പര്‍ വിവരങ്ങളും നല്‍കി, വാക്്‌സിനേഷന്‍ ചെയ്യാന്‍ ഉദ്ദേശിക്കുന്ന പ്രാഥമികാരോഗ്യ കേന്ദ്രം തിരഞ്ഞെടുത്ത് അപേക്ഷ സമര്‍പ്പിക്കാവുന്നതാണ്.

വിദേശത്ത് നിന്നും ആസ്ട്രസെനക വാക്‌സിന്‍ ഒന്നാം ഡോസ് സ്വീകരിച്ച ശേഷം കേരളത്തില്‍ നിന്ന് 4 മുതല്‍ 6 ആഴ്ചകള്‍ക്ക് ഉള്ളില്‍ രണ്ടാം ഡോസ് സ്വീകരിക്കുന്നവര്‍ രണ്ടാം ഡോസ് വാക്‌സിന്‍ ലഭിക്കുന്നതിന്നായി ഇതേ രീതിയില്‍ തന്നെ അപേക്ഷ സമര്‍പ്പിക്കേണ്ടതാണ്.

ജില്ലാ മെഡിക്കല്‍ ഓഫീസര്‍ അപേക്ഷ അംഗീകരിച്ച് കഴിഞ്ഞാല്‍ പ്രാഥമികാരോഗ്യ കേന്ദ്രത്തില്‍ നിന്ന് ഷെഡ്യൂള്‍ ചെയ്ത് വാക്്‌സിന്‍ സ്വീകരിക്കാം. രണ്ടാം ഡോസ് വാക്‌സിന്‍ സ്വീകരിച്ചതിന് ശേഷം വാക്‌സിനേഷന്‍ കേന്ദ്രത്തില്‍ നിന്ന് താല്‍ക്കാലികമായി ഒരു സര്‍ട്ടിഫിക്കറ്റ് ലഭ്യമാവുന്നതും നല്‍കിയ വിവരങ്ങള്‍ ജില്ലാ തലത്തില്‍ പരിശോധിച്ച് അംഗീകരിക്കുന്ന പക്ഷം അന്തിമ സര്‍ട്ടിഫിക്കറ്റ് പോര്‍ട്ടലില്‍ നിന്ന് ഡൗണ്‍ലോഡ് ചെയ്യാവുന്നതുമാണ്.

വിദേശത്ത് നിന്നും ആസ്ട്രസെനക വാക്‌സിന്‍ ഒന്നാം ഡോസ് സ്വീകരിച്ച ശേഷം കേരളത്തില്‍ നിന്ന് 84 ദിവസത്തിന്ന് ശേഷം രണ്ടാം ഡോസ് സ്വീകരിക്കുന്നവര്‍ അടുത്തുള്ള സര്‍ക്കാര്‍ ആശുപത്രിയില്‍ വിവരങ്ങള്‍ നല്‍കി രണ്ടാം ഡോസ് വാക്‌സിന്‍ സ്വീകരിക്കാവുന്നതാണ്.

പ്രവാസികള്‍ക്കും വിദേശത്തേക്ക് ജോലിക്കോ പഠനത്തിനോ പോകുന്നവര്‍ക്കും വാക്‌സിന്‍ ലഭിക്കുന്നതിന്നായി www.cowin.gov.in എന്ന വെബ് പോര്‍ട്ടലില്‍ പാസ്‌പോര്‍ട്ട് നമ്പര്‍ ഉപയോഗിച്ച് രജിസ്‌ട്രേഷന്‍ ചെയ്ത ശേഷം; മുന്‍ഗണന ലഭിക്കുന്നതിനായി https://covid19.kerala.gov.in/vaccine/ എന്ന വെബ് പോര്‍ട്ടലില്‍ അടിസ്ഥാന വിവരങ്ങളും, കോവിന്‍ പോര്‍ട്ടലിലെ വിവരങ്ങളും ആധാര്‍ നമ്പര്‍ വിവരങ്ങളും നല്‍കി അപേക്ഷ സമര്‍പ്പിക്കാവുന്നതാണ്.
നല്‍കിയ വിവരങ്ങള്‍ ജില്ലാ തലത്തില്‍ പരിശോധിച്ച ശേഷം മുന്‍ഗണനയും വാക്‌സിന്‍ ലഭ്യതയും അനുസരിച്ച് വാക്‌സിനേഷന്‍ കേന്ദ്രം, തിയതി, സമയം എന്നിവ എസ്എംഎസ് മുഖേന അറിയിക്കും. തുടര്‍ന്ന് അപ്പോയിന്‍മെന്റ്, എസ്.എം.എസ്, സര്‍ട്ടിഫിക്കറ്റ് എന്നിവ ഹാജരാക്കി വാക്‌സിന്‍ സ്വീകരിക്കാം.