കാസര്‍കോട്: ഫാഷന്‍ ഗോള്‍ഡ് നിക്ഷേപ തട്ടിപ്പ് കേസില്‍ മഞ്ചേശ്വരം എംഎല്‍എ എം സി ഖമറുദ്ദീനെ ക്രൈംബ്രാഞ്ചിന്റെ പ്രത്യേക അന്വേഷണ സംഘം അറസ്റ്റ് ചെയ്യും. കാസര്‍കോട് എസ്പി ഓഫിസിലേക്ക് വിളിച്ചുവരുത്തി ചോദ്യം ചെയ്തതിനു പിന്നാലെയാണ് അറസ്റ്റിലേക്കു നീളുന്നത്. അറസ്റ്റ് ഇന്നു തന്നെയെന്ന് എഎസ്പി അറിയിച്ചു.
തൃക്കരിപ്പൂര്‍ ചന്തേര പോലിസ് സ്റ്റേഷന്‍, പയ്യന്നൂര്‍ പോലിസ് സ്റ്റേഷന്‍ എന്നിവിടങ്ങളിലായി 100 ലധികം പരാതികളാണ് എംഎല്‍എയ്‌ക്കെതിരെ രജിസ്റ്റര്‍ ചെയ്തിട്ടുള്ളത്. എംഎല്‍എയ്‌ക്കെതിരെ പരാതി ഉയര്‍ന്ന് ഒരു വര്‍ഷത്തോളമായെങ്കിലും നടപടി ഉണ്ടാകുന്നത് ഇപ്പോഴാണ്.
ഫാഷന്‍ ഗോള്‍ഡിന്റെ ചെയര്‍മാനാണ് മുസ്ലിം ലീഗ് നേതാവായ ഖമറുദ്ദീന്. പ്രതിസ്ഥാനത്ത് നിന്ന് ഒഴിവാക്കണമെന്നാവശ്യപ്പെട്ട് ഖമറുദ്ദീന് ഹൈക്കോടതിയെ സമീപിച്ചിരുന്നു. മാനേജിങ് ഡയറക്ടര്‍ ടി കെ പൂക്കോയ തങ്ങള്‍ ഉള്‍പ്പെടെയുള്ളവരെ അന്വേഷണ സംഘം നേരത്തെ ചോദ്യം ചെയ്തിരുന്നു.
ഇതിനിടെ വിഷയത്തില്‍ ഇടപെട്ട മുസ്ലിം ലീഗ് സംസ്ഥാന നേതൃത്വം നിക്ഷേപകരുടെ പണം ആറ് മാസത്തിനകം തിരികെ നല്‍കണമെന്ന് ആവശ്യപ്പെട്ടിരുന്നു.
Watch this Also
