Tuesday, April 13, 2021
Home News Kerala ഭാര്യ കാണാതെ ഡ്രെയിനേജില്‍ ഒളിപ്പിച്ച മദ്യക്കുപ്പി; വ്യാജവാര്‍ത്തയില്‍ നാണംകെട്ട് പുറത്തിറങ്ങാനാവാതെ ഒരു കുടുംബം

ഭാര്യ കാണാതെ ഡ്രെയിനേജില്‍ ഒളിപ്പിച്ച മദ്യക്കുപ്പി; വ്യാജവാര്‍ത്തയില്‍ നാണംകെട്ട് പുറത്തിറങ്ങാനാവാതെ ഒരു കുടുംബം

മാവേലിക്കര: വാട്ട്‌സാപ്പ് വഴി പ്രചരിച്ച വ്യാജ വാര്‍ത്തയുടെ ഇരയായി പുറത്തിറങ്ങാനാവാതെ ഒരു കുടുംബം. ഭാര്യ കാണാതെ കുളിമുറിയില്‍ നിന്നുള്ള ഡ്രെയിനേജിനകത്ത് ഒളിപ്പിച്ച മദ്യക്കുപ്പി എടുക്കാന്‍ ശ്രമിക്കവേ കൈ കുടുങ്ങി എന്ന പേരില്‍ ആ വിഡിയോ പ്രചരിച്ച ശേഷം പുറത്തിറങ്ങാന്‍ കഴിയാത്ത അവസ്ഥയാണെന്ന് മാവേലിക്കര മാന്നാറില്‍നിന്നുള്ള ഈ വീട്ടമ്മ പറയുന്നു.

രണ്ടു ദിവസമായി ഡ്രെയ്നേജില്‍ പ്രശ്നമുണ്ടായിരുന്നു. പ്ലംബറെ വിളിച്ചിട്ടും എത്തിയില്ല. രണ്ടു കുളിമുറിയിലെയും വെള്ളം ഒരു പൈപ്പിലേക്കാണ് വന്നിരുന്നത്. ഡ്രെയ്നേജ് അടഞ്ഞതോടെ കുളിമുറികളില്‍ വെള്ളം നിറഞ്ഞു. ഡ്രെയ്നേജിന് അകത്ത് എന്തെങ്കിലും തടസം ഉണ്ടോ എന്നു പരിശോധിക്കുന്നതിനിടയിലാണ് ഭര്‍ത്താവിന്റെ കൈ കുടുങ്ങിയത്. ഞങ്ങള്‍ പരമാവധി ശ്രമിച്ചെങ്കിലും സ്റ്റീലിന്റെ ഭാഗമുള്ളതിനാല്‍ കൈ പുറത്തെടുക്കാനായില്ല. തുടര്‍ന്നാണ് അഗ്നിശമനസേനയെ വിളിച്ചതും അവര്‍ വന്ന് രക്ഷപ്പെടുത്തിയതും- അവര്‍ അറിയിച്ചു.


ഭാര്യ അറിയാതെ ഒളിപ്പിച്ച മദ്യം എടുക്കുന്നതിനിടെയാണ് കൈ കുടുങ്ങിയതെന്ന തെറ്റായ വിവരം വളരെ വേഗത്തിലാണ് പ്രചരിച്ചത്. അധികം വൈകാതെ വീഡിയോ വൈറലായി. ആരാണ് തെറ്റായ പ്രചാരണം നടത്തിയതെന്നു വ്യക്തമല്ല. ഇതിനെതിരെ നിയമനടപടി സ്വീകരിക്കുന്നതിനെക്കുറിച്ച് കുടുംബം ആലോചിച്ചു വരികയാണ്. സഭവത്തിനുശേഷം . പുറത്തിറങ്ങാനാകാത്ത അവസ്ഥയാണെന്നും കൂട്ടുകാര്‍ വിളിച്ചു ചോദിക്കുന്നതിനാല്‍ മകളും മാനസിക വിഷമത്തിലാണെന്ന് അമ്മ പറഞ്ഞു.

ഒളിപ്പിച്ച മദ്യം എടുക്കുന്നതിനിടെയാണ് കൈ കുടുങ്ങിയതെന്ന പ്രചാരണം വ്യാജമാണെന്ന് മാവേലിക്കര ഫയര്‍ഫോഴ്സ് ഓഫിസും അറിയിച്ചു. ഡ്രെയ്നേജ് വൃത്തിയാക്കുന്നതിനിടെ 26ാം തിയതി രാത്രിയാണ് മധ്യവയസ്‌കന്റെ കൈ കുടുങ്ങിയതെന്നും ടൈല്‍സ് അടക്കം മാറ്റിയാണ് ആളെ രക്ഷപ്പെടുത്തിയതെന്നും ഫയര്‍ഫോഴ്സ് ഉദ്യോഗസ്ഥര്‍ പറഞ്ഞു.

 

Most Popular