Saturday, July 24, 2021
Home News National വിദേശത്തു നിന്ന് വരുന്നവര്‍ക്ക് പുതിയ മാര്‍ഗ നിര്‍ദേശം; ക്വാറന്റീനില്‍ ഇളവ്

വിദേശത്തു നിന്ന് വരുന്നവര്‍ക്ക് പുതിയ മാര്‍ഗ നിര്‍ദേശം; ക്വാറന്റീനില്‍ ഇളവ്

ന്യൂഡല്‍ഹി: വിദേശ രാജ്യങ്ങളില്‍നിന്ന് ഇന്ത്യയിലേക്ക് എത്തുന്നവര്‍ക്ക് കേന്ദ്ര ആഭ്യന്തര മന്ത്രാലയം പുതിയ മാര്‍ഗനിര്‍ദേശങ്ങള്‍ പുറത്തിറക്കി. ആഗസ്ത് 8 മുതല്‍ പുതിയ മാര്‍ഗനിര്‍ദേശം പ്രാബല്യത്തില്‍ വരും. ഇന്ത്യയിലേക്കും പുറത്തേക്കുമുള്ള വിമാന സര്‍വീസുകള്‍ക്കുള്ള വിലക്ക് ആഗസ്ത് 31 വരെ ഡിജിസിഎ നീട്ടിയിരുന്നു.

പ്രധാന മാര്‍ഗനിര്‍ദേശങ്ങള്‍:

-എല്ലാ യാത്രക്കാരും യാത്ര പുറപ്പെടുന്നതിന് 72 മണിക്കൂര്‍ മുന്‍പ് newdelhiairport.in എന്ന പോര്‍ട്ടലില്‍ സ്വയം സാക്ഷ്യപ്പെടുത്തിയ ഫോം സമര്‍പ്പിക്കണം.

-ഇന്ത്യയിലെത്തിയാല്‍ 14 ദിവസം നിര്‍ബന്ധിത ക്വാറന്റീന്‍. ഇതില്‍ ഏഴ് ദിവസം പണം നല്‍കിയുള്ള ഇന്‍സ്റ്റിറ്റിയൂഷനല്‍ ക്വാറന്റീനും ഏഴ് ദിവസം ഹോം ക്വാറന്റീനും

-യാത്ര പുറപ്പെടുന്നതിന് 96 മണിക്കൂര്‍ മുന്‍പ് വരെ നടത്തിയ ആര്‍ടി-പിസിആര്‍ ടെസ്റ്റില്‍ കോവിഡ് ഫലം നെഗറ്റീവുള്ളവര്‍ക്ക് ഇന്‍സ്റ്റിറ്റിയൂഷനല്‍ ക്വാറന്റീന്‍ നിര്‍ബന്ധമില്ല.

-കോവിഡ് ഫലം നെഗറ്റീവായവര്‍ പരിശോധനയുടെ സാക്ഷ്യപ്പെടുത്തിയ റിപ്പോര്‍ട്ട് യാത്ര പുറപ്പെടുന്നതിന് മുന്‍പ് പോര്‍ട്ടലില്‍ അപ്ലോഡ് ചെയ്യണം. റിപ്പോര്‍ട്ടില്‍ കൃത്രിമം കാണിച്ചാല്‍ ക്രിമിനല്‍ കേസ്.

-ഗുരുതര അസുഖമുള്ളവര്‍, ഗര്‍ഭിണികള്‍, പത്ത് വയസില്‍ താഴെയുള്ള കുട്ടികള്‍ക്കൊപ്പം വരുന്ന മാതാപിതാക്കള്‍, മരണാനന്തര ചടങ്ങില്‍ പങ്കെടുക്കാന്‍ വരുന്നവര്‍ എന്നിവര്‍ക്കും 14 ദിവസം ഹോം ക്വാറന്റീന്‍ അനുവദിക്കും. എന്നാല്‍ ഇളവ് ആവശ്യമുള്ളവര്‍ യാത്ര പുറപ്പെടുന്നതിന് 72 മണിക്കൂര്‍ മുന്‍പ് പോര്‍ട്ടലിലൂടെ അപേക്ഷിക്കണം. ഇളവ് അനുവദിക്കുന്നതില്‍ അന്തിമതീരുമാനം സര്‍ക്കാര്‍ അധികൃതര്‍ക്കായിരിക്കും.

ക്വാറന്റീന്‍, ഐസൊലേഷന്‍ എന്നിവ സംബന്ധിച്ച് സംസ്ഥാന സര്‍ക്കാരുകള്‍ക്ക് ആവശ്യമായ മാറ്റങ്ങള്‍ വരുത്താമെന്ന് മാര്‍ഗനിര്‍ദേശങ്ങളില്‍ പറയുന്നുണ്ട്. കേരളത്തില്‍ നിലവില്‍ വിദേശത്ത് നിന്നെത്തുന്ന മുഴുവന്‍ പേരെയും വിമാനത്താവളങ്ങളില്‍ റാപിഡ് ടെസ്റ്റ് നടത്തി നെഗറ്റീവ് ആയവരെ വീടുകളിലേക്ക് അയക്കുകയാണ് ചെയ്യുന്നത്. ഇത് തുടരുമെന്നാണ് കരുതുന്നത്.


 

Most Popular