Wednesday, July 28, 2021
Home News Kerala മകൻ പിതാവിനെ തോളിലേറ്റി നടന്ന സംഭവം വ്യാജമെന്ന് പോലീസ്: കേസ് തീർപ്പാക്കി മനുഷ്യാവകാശ കമ്മീഷൻ

മകൻ പിതാവിനെ തോളിലേറ്റി നടന്ന സംഭവം വ്യാജമെന്ന് പോലീസ്: കേസ് തീർപ്പാക്കി മനുഷ്യാവകാശ കമ്മീഷൻ

കൊല്ലം: ലോക്ക്ഡൗൺ സമയത്ത് പുനലൂർ താലൂക്ക് ആശുപതിയിൽ ചികിത്സയിലായിരുന്ന പിതാവിനെ തോളിലേറ്റി അരകിലോമീറ്റർ നടന്ന സംഭവം മകൻ റോയി മനപൂർവം സൃഷ്ടിച്ചതാണെന്ന് കൊല്ലം ജില്ലാ റൂറൽ പോലീസ് മേധാവി മനുഷ്യാവകാശ കമ്മീഷനെ അറിയിച്ചു. ഇതിനെ തുടർന്ന് കമ്മീഷൻ സ്വമേധയാ രജിസ്റ്റർ ചെയ്ത കേസ് അംഗം വി കെ ബീനാകുമാരി തീർപ്പാക്കി.

കഴിഞ്ഞ ഏപ്രിൽ 14നായിരുന്നു സംഭവം. മതിയായ രേഖകൾ ഇല്ലാതെയാണ് ലോക്ക്ഡൗൺ കാലയളവിൽ കുളത്തൂപ്പുഴ സ്വദേശി ഐ പി ജോർജിനെ ആശുപത്രിയിൽ നിന്ന് വീട്ടിലേക്ക് കൊണ്ടു പോകാൻ മകൻ റോയ്‌മോൻ ഓട്ടോയിൽ എത്തിയത്. വഴിയിൽ പോലീസ് ഓട്ടോറിക്ഷ തടഞ്ഞു. ഓട്ടോ നിർത്തി ആശുപത്രിയിലേക്ക് നടന്നു പോയ റോയ്‌മോൻ മറ്റൊരു ഓട്ടോയിൽ അച്ഛനും അമ്മയുമായി തന്റെ ഓട്ടോക്ക് സമീപത്തെത്തി.

പോലീസ് പരിശോധന നടക്കുന്നത് കണ്ട ഓട്ടോ ഡ്രൈവർ കുടുംബത്തെ അവിടെ ഇറക്കി വിട്ടു. തുടർന്ന് മകൻ പിതാവിനെ എടുത്തുയർത്തി മുന്നോട്ട് നടക്കുകയായിരുന്നുവെന്ന് റിപ്പോർട്ടിൽ പറയുന്നു. യഥാർഥത്തിൽ പിതാവിന് നടന്നു പോകാൻ കഴിയുമായിരുന്നു എന്നാണ് പോലീസ് റിപ്പോർട്ടിൽ പറയുന്നത്. ഈ സാഹചര്യത്തിലാണ് അനന്തര നടപടികൾ കൂടാതെ കേസ് തീർപ്പാക്കിയത്.

Most Popular