Saturday, June 19, 2021
Home Newsfeed സാമ്പത്തിക കുറ്റകൃത്യ നിരോധന സംവിധാനം: യുഎഇയില്‍ സ്ഥാപനങ്ങള്‍ക്ക് രജിസ്റ്റര്‍ ചെയ്യാനുള്ള സമയപരിധി ഈ മാസം അവസാനിക്കും

സാമ്പത്തിക കുറ്റകൃത്യ നിരോധന സംവിധാനം: യുഎഇയില്‍ സ്ഥാപനങ്ങള്‍ക്ക് രജിസ്റ്റര്‍ ചെയ്യാനുള്ള സമയപരിധി ഈ മാസം അവസാനിക്കും

അബൂദബി: യുഎഇയില്‍ സാമ്പത്തിക കുറ്റകൃത്യ നിരോധന സംവിധാനത്തില്‍ രജിസ്റ്റര്‍ ചെയ്യാന്‍ സ്ഥാപനങ്ങള്‍ക്കു നല്‍കിയ സമയപരിധി ഈ മാസം അവസാനിക്കും. സമയപരിധി ഈ മാസം 30നാണ് അവസാനിക്കുന്നത്. കള്ളപ്പണം വെളുപ്പിക്കല്‍, തീവ്രവാദ പ്രവര്‍ത്തനങ്ങള്‍ക്കു ധനസഹായം നല്‍കല്‍ എന്നിവയ്‌ക്കെതിരായ സംവിധാനത്തില്‍ ഡെസിഗ്‌നേറ്റഡ് നോണ്‍ ഫിനാന്‍ഷ്യല്‍ ബിസിനസ് ആന്‍ഡ് പ്രഫഷന്‍സ് വിഭാഗത്തിലുള്ള സ്ഥാപനങ്ങളാണ് റജിസ്റ്റര്‍ ചെയ്യേണ്ടത്. ബ്രോക്കര്‍മാര്‍, റിയല്‍ എസ്റ്റേറ്റ് ഏജന്റുമാര്‍, ഓഡിറ്റര്‍മാര്‍, സ്വര്‍ണം, വജ്ര ഇടപാടുകാര്‍, കോര്‍പറേറ്റ് സര്‍വീസ് പ്രൈവഡര്‍മാര്‍ തുടങ്ങിയ സ്ഥാപനങ്ങളാണ് ഈ വിഭാഗത്തില്‍ പെടുക. ഗൊഎഎംഎല്‍ സിസ്റ്റം, ഓട്ടമാറ്റിക് റിപ്പോര്‍ട്ടിങ് സിസ്റ്റം ഫോര്‍ സാങ്ഷന്‍സ് ലിസ്റ്റ് എന്നിവയിലാണ് റജിസ്റ്റര്‍ ചെയ്യേണ്ടത്. മാര്‍ച്ച് 30നകം റജിസ്റ്റര്‍ ചെയ്യാനായിരുന്നു നിര്‍ദേശമെങ്കിലും പിന്നീട് ഏപ്രില്‍ 30 വരെ സാവകാശം നല്‍കയായിരുന്നു.

കുറ്റക്കാര്‍ക്കെതിരെ ശക്തമായ നടപടി സ്വീകരിക്കുമെന്ന് സാമ്പത്തിക മന്ത്രാലയം മുന്നറിയിപ്പു നല്‍കി. നിയമലംഘകരെ കണ്ടെത്താന്‍ മേയ് ഒന്നു മുതല്‍ പരിശോധന ആരംഭിക്കും. സ്ഥാപനങ്ങളുടെ ധനവിനിമയം സുതാര്യമാക്കുന്നതോടൊപ്പം കള്ളപ്പണം വെളുപ്പിക്കുന്നതും ഭീകരവാദത്തിന് സാമ്പത്തിക സഹായം നല്‍കുന്നതും തടയുകയാണ് ലക്ഷ്യമെന്ന് ആന്റി മണി ലോണ്ടറിങ് വകുപ്പ് ഡയറക്ടര്‍ സഫിയ അല്‍ സാഫി പറഞ്ഞു. സംശയാസ്പദ ഇടപാടുകള്‍ നിരീക്ഷിച്ച് കുറ്റക്കാര്‍ക്കെതിരെ നടപടി കൈക്കൊള്ളും. 50,000 മുതല്‍ 50 ലക്ഷം ദിര്‍ഹം വരെയാണ് പിഴ. വിവരങ്ങള്‍ക്ക് 800 1222 നമ്പറിലോ സാമ്പത്തിക മന്ത്രാലയത്തിന്റെ വെബ്‌സൈറ്റിലോ ബന്ധപ്പെടാം.

അതേസമയം വ്യാജ പേരില്‍ ബാങ്ക് അക്കൗണ്ട് തുറക്കുകയും പ്രാദേശിക, രാജ്യാന്തര ലൈസന്‍സില്ലാതെ പ്രവര്‍ത്തിക്കുകയും ചെയ്യുന്ന കമ്പനികള്‍ക്ക് 10 ലക്ഷം ദിര്‍ഹം പിഴ ചുമത്തുന്നതാണ്. സംശയകരവും രേഖയില്ലാത്തുമായ ഇടപാടുകള്‍ നടത്തുക, ഇടപാടു വിവരങ്ങള്‍ അധികാരികള്‍ക്ക് കൈമാറാതിരിക്കുക, നേരിട്ടോ അല്ലാതെയോ സംശയകരമായ ഇടപാട് നടത്തുക, കള്ളപ്പണം വെളുപ്പിക്കുന്നതിനെതിരായ നിയമം നടപ്പാക്കാതിരിക്കുക, സുരക്ഷാ സംവിധാനമൊരുക്കുന്നതില്‍ വീഴ്ച വരുത്തിയാല്‍ 2 ലക്ഷം ദിര്‍ഹം അടയ്‌ക്കേണ്ടിവരുന്നതാണ്. എന്നാല്‍ ഇടപാട് സുതാര്യമാക്കുന്ന നടപടികളില്‍ വീഴ്ചവരുത്തുക, നിയമവിരുദ്ധ ഇടപാട് തിരിച്ചറിയാതിരിക്കുക, ബന്ധം സ്ഥാപിക്കുന്നതിനു മുന്‍പ് ഇടപാടുകാരെക്കുറിച്ച് മനസിലാക്കാതിരിക്കുക, ഇടപാടുകാരുടെ ഡേറ്റകളും രേഖകളും സുതാര്യമാണെന്നു ഉറപ്പുവരുത്താതിരിക്കുക, പണം കുറ്റകൃത്യത്തിനു ഉപയോഗിക്കുകയും രേഖകള്‍ സൂക്ഷിക്കാതിരിക്കുകയും ചെയ്താല്‍ 1 ലക്ഷം ദിര്‍ഹം പിഴ ചുമത്തുന്നതാണ്.

ഇനി കുറ്റകൃത്യങ്ങളും സംശയാസ്പദമായ ഇടപാടുകളും തടയുന്നതിന് ആവശ്യമായ നയങ്ങള്‍ രൂപീകരിക്കാതിരിക്കുക, ഇടപാടുകാരുടെ ബിസിനസ്, വ്യാപാര ബന്ധം, സ്വഭാവം എന്നിവ മനസ്സിലാക്കുന്നതില്‍ വീഴ്ച വരുത്തുക, ഇടപാട് നിരന്തര നിരീക്ഷണത്തിനു വിധേയമാക്കാതിരിക്കുക, പ്രശ്‌നപരിഹാരത്തിനു ഓഫിസറെ നിയമിക്കാതിരിക്കുക, ഇടപാടു വിവരങ്ങള്‍ ശരിയായ വിധത്തില്‍ രേഖപ്പെടുത്താതിരിക്കുക, വിവരം 5 വര്‍ഷം വരെ സൂക്ഷിക്കാതിരിക്കുക, ഇടപാടുകാരുമായി ബന്ധപ്പെട്ട വിവരം അധികൃതര്‍ ആവശ്യപ്പെട്ടിട്ടും നല്‍കാതിരിന്നാല്‍ പിഴ 50,000 ദിര്‍ഹം ചുമത്തുന്നതാണ്.

 

Most Popular