Sunday, October 24, 2021
HomeSpecialവാട്സാപ്പിന്റെ ഏറ്റവും പുതിയ ഫീച്ചര്‍ ഇന്ത്യയിലും ലഭ്യമായി തുടങ്ങി; അറിഞ്ഞിരിക്കേണ്ട കാര്യങ്ങള്‍ ഇവയാണ്

വാട്സാപ്പിന്റെ ഏറ്റവും പുതിയ ഫീച്ചര്‍ ഇന്ത്യയിലും ലഭ്യമായി തുടങ്ങി; അറിഞ്ഞിരിക്കേണ്ട കാര്യങ്ങള്‍ ഇവയാണ്

ന്യൂഡല്‍ഹി: വാട്സാപ്പിന്റെ ഏറ്റവും പുതിയ ഫീച്ചര്‍ ഇന്ത്യയിലും ലഭ്യമായി തുടങ്ങി. ഒരാള്‍ക്ക് അയയ്ക്കുന്ന വാട്സാപ്പ് സന്ദേശം (മീഡിയ ഫയല്‍ ഉള്‍പ്പടെ) ഏഴു ദിവസം കഴിയുമ്പോള്‍ അപ്രത്യക്ഷമാകുന്ന പുതിയ ഫീച്ചര്‍ ആണ് ഇപ്പോള്‍ ആരംഭിച്ചിരിക്കുന്നത്. നേരത്തെ അമേരിക്ക ഉള്‍പ്പടെയുള്ള സ്ഥലങ്ങളില്‍ ഈ ഫീച്ചര്‍ വാട്സാപ്പ് നടപ്പാക്കിയിരുന്നു. ഇന്ത്യയില്‍ ആന്‍ഡ്രോയ്ഡ്, ഐ.ഒ.എസ്, ഡെസ്‌ക്ടോപ്പ്, വെബ് തുടങ്ങിയ എല്ലാ പ്ലാറ്റ്ഫോമുകളിലും വാട്സാപ്പിന്റെ പുതിയ ഫീച്ചര്‍ ലഭ്യമാണ്.

ഇത് ഓണ്‍ ആക്കിയാല്‍ ഒരു ഉപയോക്താവിന് അയച്ച മെസേജ് ഏഴു ദിവസത്തിനകം അപ്രത്യക്ഷമാകും. ഗ്രൂപ്പ് ചാറ്റുകളിലും ഇത് ലഭ്യമാണ്. എന്നാല്‍ അതിന്റെ നിയന്ത്രണം അഡ്മിന് ആയിരിക്കുമെന്ന് മാത്രം. ശ്രദ്ധിക്കേണ്ട ഒരു കാര്യം, ലഭിക്കുന്ന ആളുടെ ഫോണില്‍നിന്ന് ഏഴുദിവസം കഴിയുമ്പോള്‍ മെസേജുകള്‍ അപ്രത്യക്ഷമാകുമെങ്കിലും, അവര്‍ക്ക് അതിന്റെ സ്‌ക്രീന്‍ഷോട്ട് എടുക്കാനാകും

ഡിസപ്പിയറിങ് മെസേജ് ഫീച്ചര്‍ ഇനേബിള്‍ ചെയ്യേണ്ടത് ഇങ്ങനെ-ആന്‍ഡ്രോയ്ഡ് ഫോണില്‍ ഒരു ചാറ്റ് ഓപ്പണ്‍ ചെയ്യുക. അതിലെ കോണ്‍ടാക്ട് നെയിമില്‍ ക്ലിക്ക് ചെയ്യുക, ‘Disappearing messages’ ഓപ്ഷന്‍ തെരഞ്ഞെടുക്കുക. അതിനുശേഷം ‘CONTINUE’ നല്‍കി On സെലക്ട് ചെയ്താല്‍ മതി. Off സെലക്ട് ചെയ്താല്‍ ഈ ഫീച്ചര്‍ ഉപയോഗിക്കുന്നത് നിര്‍ത്താം. ഇതേപോലെ തന്നെ ഡെസ്‌ക്ടോപ്പ്, വെബ് കൈ.ഒ.എസ് എന്നിവിടങ്ങളിലും ഡിസപ്പിയറിങ് മെസേജ് ഫീച്ചര്‍ ഇനേബിള്‍ ചെയ്യാം.

അതേസമയം, ഒരു വാട്ട്‌സ്ആപ്പ് ഗ്രൂപ്പില്‍ ഫീച്ചര്‍ പ്രവര്‍ത്തനക്ഷമമാക്കുന്നതിന്, ആന്‍ഡ്രോയ്ഡ് അല്ലെങ്കില്‍ ഐ.ഒ.എസ് ആപ്ലിക്കേഷന്‍ ഉള്ള അഡ്മിന്‍മാര്‍ വാട്സ്ആപ്പ് ഗ്രൂപ്പ് ചാറ്റ് ഓപ്പണ്‍ ചെയ്യുക, ഗ്രൂപ്പിന്റെ പേരില്‍ ക്ലിക്ക് ചെയ്യുക അതില്‍ ‘Disappearing messages’ ക്ലിക്ക് ചെയ്യുക ശേഷം ‘CONTINUE’ ചെയ്തു ഓണ്‍ എന്ന ഓപ്ഷന്‍ തിരഞ്ഞെടുക്കുക. വാട്സ്ആപ്പ് ഡെസ്‌ക്ടോപ്പിനും വാട്സ്ആപ്പ് വെബിനും ഈ രീതി അതേപടി തുടരുന്നു. വാട്സ് ആപ്പ് കൈയോസ് ആപ്ലിക്കേഷനുള്ള ഗ്രൂപ്പ് അഡ്മിനുകള്‍, വാട്സ് ആപ്പ് ഗ്രൂപ്പ് ചാറ്റ് തുറക്കുക ഗ്രൂപ്പിന്റെ പേരില്‍ ക്ലിക്ക് ചെയ്യുക ‘Disappearing messages’ ക്ലിക്ക് ചെയ്യുക ആവശ്യപ്പെടുകയാണെങ്കില്‍, ‘CONTINUE’ ചെയ്തു ഓണ്‍ എന്ന ഓപ്ഷന്‍ തിരഞ്ഞെടുക്കുക.

വാട്സ് ആപ്പ് Disappearing messages ഇപ്പോള്‍ സജീവമാക്കി എന്ന സന്ദേശം രണ്ട് കക്ഷികള്‍ക്കും ചാറ്റ് ബോക്സില്‍ ദൃശ്യമാകും. എന്നിരുന്നാലും, ഫീച്ചര്‍ പ്രാപ്തമാക്കുമ്പോഴോ അപ്രാപ്തമാക്കുമ്പോഴോ വാട്സ് ആപ്പ് നോട്ടിഫിക്കേഷന്‍ ഒന്നും അയയ്ക്കില്ല. അപ്രത്യക്ഷമായ സന്ദേശം ഒരു ഗ്രൂപ്പിലേക്കോ വ്യക്തിഗത ചാറ്റിലേക്കോ കൈമാറുകയാണെങ്കില്‍, കൈമാറിയ Disappearing messages ഒഴിവാക്കില്ലെന്നും നേരത്തെ വാട്സ് ആപ്പ് മുന്നറിയിപ്പ് നല്‍കിയിരുന്നു. അതുപോലെ, ഒരു സന്ദേശം സ്വയം ഇല്ലാതാക്കുന്നതിനുമുമ്പ് ഉപയോക്താവ് ഒരു ബാക്കപ്പ് സൃഷ്ടിക്കുകയാണെങ്കില്‍, ഫയല്‍ അതില്‍ സുരക്ഷിതമായിരിക്കും.

കൂടാതെ, ഓട്ടോമാറ്റിക്-ഡൗണ്‍ലോഡ് പ്രവര്‍ത്തനക്ഷമമാക്കിയിട്ടുണ്ടെങ്കില്‍, മീഡിയ ഫയലുകള്‍ സ്മാര്‍ട്ട്‌ഫോണില്‍ സംരക്ഷിക്കപ്പെടുമെങ്കിലും ഏഴ് ദിവസത്തിന് ശേഷം ചാറ്റില്‍ നിന്ന് അപ്രത്യക്ഷമാകും. കൂടാതെ, ഒരു ചാറ്റില്‍ അപ്രത്യക്ഷമാകുന്ന സന്ദേശത്തിന് നിങ്ങള്‍ പ്രത്യേകമായി മറുപടി നല്‍കുകയാണെങ്കില്‍, ഉദ്ധരിച്ച സന്ദേശ വാചകം ഏഴു ദിവസത്തിനുശേഷവും ദൃശ്യമാകും.

അപ്രത്യക്ഷമാകുന്ന സന്ദേശ ഓപ്ഷന്‍ പ്രവര്‍ത്തനക്ഷമമാക്കുന്നതിന് മുമ്പുള്ള മുന്‍ സന്ദേശങ്ങളോ മീഡിയ ഫയലുകളോ ബാധിക്കില്ലെന്നും വാട്സ്ആപ്പ് വിശദീകരിച്ചിരുന്നു. ഉപയോക്താക്കള്‍ക്ക് ഓപ്ഷന്‍ കാണാന്‍ കഴിയുന്നില്ലെങ്കില്‍, ബന്ധപ്പെട്ട ആപ്ലിക്കേഷന്‍ സ്റ്റോറില്‍ നിന്ന് വാട്സാപ്പിന്റെ ഏറ്റവും പുതിയ പതിപ്പ് ഡൗണ്‍ലോഡ് ചെയ്യാനും കമ്പനി നിര്‍ദ്ദേശിക്കുന്നു.

Most Popular